Proiektua Topategia topagune bat da: Nafarroako hainbat agente artistikoren* erreferentziak biltzen dituen espazio birtuala. Espazio horretan Nafarroako ikuspegi artistikoan dauden (eta egon diren) agenteak aurkitzeko, biltegiratzeko, horiekin harremanetan jartzeko, eta horien inguruan datuak biltegiratzeko, ikasteko, ikertzeko eta esploratzeko lekua osatzen da.

Topategia agente artistiko horiek zenbait irizpideren arabera arakatzeko aukera ematen duen bilatzailea ere bada. Norberak bere profilean sartzen dituen datuen arabera osatzen dira bilaketa-irizpideak. Proiektuak garrantzia eman nahi dio etiketen (agenteen lanak eta interesak identifikatzeko kontzeptuak) arteko erlazioari. Bilaketa-irizpide oparoei esker, topatzeko aukerak amaigabeak dira, eta horiek Nafarroako ikuspegi artistikoaren aniztasuna bildu eta islatzen dute.

Halaber, erraz erabiltzeko eta datu-baseko edukiak atzitu ahal izateko helburuarekin sortu da. Bertan izena ematen duten agente artistikoak sustatzeaz gain, Topategiak ikerketari ere laguntzen dio, bai artista-elkarte barruan, bai kultur eta humanitateen ikerketen edozein alorretan.

Nafarroako kultur agenteak mapeatzeko proposamen gisa jaio zen Topategia, Mapeo proiektuaren baitan: Nafarroako sare kulturala erregistratzeko prozesu bat, zeinak aukera ematen duen hortik ateratako tresnak edo estrategiak aurrerago edo beste interes batzuekin erabiltzeko. Uharteko Arte Garaikide Zentroak sustatzen du hori. Hona hemen helburu hori betetzeko dirulaguntza jaso zuten proiektuak, Topategia sortzeko erabili direnak: Geodesia (2017), Kamal (2018) eta Erraiak (2019).

* Arteari lotutako jarduerak egiten dituen pertsona, elkarte, entitate edo ekitaldia, Nafarroan bizi dena edo bertakoa dena.