Pistas para otros procesos curatoriales aurkezpenean, Eduardo Bruno eta Waldírio Castro komisarioek “Prozesuaren Komisariotza” izeneko metodologiaren inguruan Uharte Zentroan garatzen ari diren ikerketa aurkeztuko dute. Proposamen hau komisariotza erakusketa-formatuetatik haratago pentsatzeko interesa duen praktika hedatu, kokatu eta etengabe birpentsatu gisa ulertzen da.
Jarduera hau PRIS (Egoitza eta Elkartruke Programa) izeneko programaren baitan Uharte Zentroan garatzen ari diren egoitza artistikoaren testuinguruan kokatzen da. Programa honek artearen ikuspegi trans/a/postdisziplinariotik kulturako profesionalen arteko elkarrizketak sustatzea du helburu. Sorkuntza poetiko garaikideen testuinguruan, jakintza artistikoen arteko mugak lausotu egiten dira, eta hizkuntzen arteko gurutzaketa eta hibridazioa bultzatzen dira ikerketa eta sorkuntza berrietarako.
PRIS programak artistei euren ideiak zabaltzeko aukera emateaz gain, kulturarteko elkartrukea sustatzen du, artea egiteko forma tradizionalak zalantzan jartzen ditu, eta arte-esparruko tresna eta sareetarako sarbidea demokratizatzen du. Esperientzia partekatuan eta ezagutzaren trukean oinarritutako sorkuntza-filosofia baten bidez, programa honek praktika garaikideak sendotzen ditu eta hizkuntza artistiko anitzetan murgiltzearen bitartez artisten lana babesten du.
Aurkezpenean “Prozesuaren Komisariotza” metodologiaren xehetasunak azaltzeaz gain, Bruno eta Castrok euren doktoretza-ikerketak partekatuko dituzte. Lan horien bidez, Brasilgo Ipar eta Ipar-ekialdeko eskualdeetan garatzen ari diren praktika artistiko garaikideen ikuspegi bat marraztu daiteke. Haien ikerketek diziplinen arteko ikuspegietatik edaten dute, artea, performance-a, ikuspegi queer-ak, aktibismoa eta disidentzia-territorioak uztartuz.
Eduardo Bruno komisarioa, artista, ikertzailea eta irakaslea da. Arteetan doktoregai da ICA/UFPA-n, Arteetan masterra ECA/USP-n, Semiotikan espezialista UECE-n, Antzerkian lizentziatua IFCE-n eta Gastronomian graduatua UFC-n. Arte garaikidean, performance-an eta hiri-esku-hartzean ardazten da bere lana. Nomadismo Urbano: Performance e Cartografia eta O que é performance: 31 programas performáticos para confundir a pergunta liburuen egilea da.
Waldírio Castro komisarioa, artista eta ikertzaile indisziplinarioa da, Fortaleza (CE)-n bizi da. Arteetan doktoregai da UFPA-n, masterra Arteetan UFC-n, eta Semiotikan espezialista UECE-n. Arte Ederretan lizentziatua da UNINTER-en eta Administrazioan UEPB-n. Hainbat liburu argitaratu ditu, besteak beste Em terra de homofóbicos casamento gay é arte: Artivismo, norma e disrupção eta Entre a desimaginação e a reimaginação: perspectivas queer nas artes contemporâneas cearenses.
