Uharte Zentroak eta Hub Cultural Porto Dragãok sustatutako arte-egonaldiaren deialdia ebatzi da. Deialdi hau topaketa, hausnarketa eta elkarren arteko espazioak sortzea esploratzen duten proiektuei zuzenduta dago, non interakzio eta lankidetza modu berriak sortu ahal izango diren. Egonaldia prozesu artistikoak sustatzeko asmoarekin antolatu da; hausnarketa partekatuaren bitartez, ikuspegi eta praktika berriak garatzen laguntzea du helburu, arte eszenikoetatik, arte bisualetatik edo ikerketa kuratorialetik abiatuta.
Ebaluazio eta hautaketa prozesuaren ondoren, Andrea Ganuzaren proiektuari egoitza ematea erabaki da. Proiektuak Fortaleza hiriko aberastasun kulturalean eta Cearako ondarean inspiratutako orakulu grafiko bat garatzea proposatzen du, bertako borroka sozialak eta gai politikoak txertatuz. Tarotaren oinarrian, irudi arketipikoak erabiliko dira esplorazio sinbolikorako eta autoezagutzarako. Lurralde-ikerketaren, marrazki sinbolikoaren, arte grafikoen eta ahozko narrazioaren bidez, sinboloak eta kosmobisioak birkonfiguratzea bilatzen da, ingurunearekin elkarrizketa eta lotura sakona sortzeko tresna bat eraikitzeko.
Hautatutako proposamenak 1.200 euroko ordainsaria jasoko du eta 5.000 erreal bidaiak eta dietak ornitzeko. Horrez gain, Fortalezan ostatu izango du, baita Nafarroatik Fortalezara joateko bidaia ere. Hub Cultural Porto Dragãon lanerako espazio bat izango du, eta Uharte Zentroko eta Hub Cultural Porto Dragãoko taldearen laguntza jasoko du proiektua garatzeko. Gainera, egonaldiaren jardueretan parte hartuko du, hala nola, mintegietan, artistekin eta gonbidatuekin egindako topaketetan, eta Fortaleza-CEko kultur zentroetara egindako bisitetan.
Hub Cultural Porto Dragãok, Instituto Dragão do Mar (IDM) erakundearekin lankidetzan, Cearán ekoiztutako artea eta kultura balioan jarri nahi ditu, bereziki hiri-periferian eta udalerrietako barrualdean. Espazio fisikoa gainditzen duten ekintza-estrategien bidez, aukerak eta diru-sarrerak sortzen dira, eta bertako sormen-ekonomia indartzen da. Testuinguru horretan, egonaldia ez da soilik artista batzuen proiektu indibidualak garatzeko babesa, baizik eta komunitate eta kultur eragile desberdinekin elkarlanean aritzeko aukera ere, ikaskuntza eta truke-ingurune bat sortuz, horrek arte-sorkuntza eta testuinguru soziala aberastuz.
Bestalde, Uharte Zentroan beste egonaldi bat garatzen ari da, Programa de Residencia e Intercambio (PRIS) programaren barruan. Egonaldi honek kultur arloko profesionalen arteko elkarrizketak sustatu nahi ditu, artearen ikuspegi trans/a/postdisziplinariotik abiatuta. Poesia garaikidearen testuinguruan, jakintza artistikoen arteko mugak lausotzen dira, hibridotasuna eta hizkuntzen uztarketa sustatuz ikerketa eta sorkuntza berrietarako. PRISek artistei beren ideiak zabaltzeko aukera emateaz gain, truke kulturala bultzatzen du, artea egiteko modu tradizionalak zalantzan jartzen ditu, eta sormenaren esparruan baliabideak eta sareak demokratizatzen ditu. Programa honek praktika artistiko garaikideak indartzen ditu eta artista parte-hartzaileei hainbat hizkuntza artistikotan murgiltzeko aukera eskaintzen die, esperientzia partekatuan eta ezagutza-trukean oinarritutako sormen-filosofiari jarraituz. Egonaldi honetako parte-hartzaileak Waldirio Castro eta Eduardo Bruno dira.
Fortalezako eta Uharte Zentroko bi egonaldiak uztartuz, nazioarteko lankidetza-sarea indartzen da, narratiba eta metodologia berrien esplorazioa sustatuz eta ekimen horien inpaktua arte-garapenean areagotuz.
